BUTUAN CITY – Padayon pa ang pre-charge investigation sa mga sakop sa Agusan del Norte Police Provincial Investigation Management Section kalabot sa matud pa, pagpangulatang gihimo sa hepe sa Cabadbaran City Police Station ngadto sa iyang sakop tungod saw ala matud pa pagsunod niini sa iyang sugo.
Sigon ni P/Col. Ramir Perlas – provincial director sa Agusan del Norte Police Provincial Office, dali niyang gi-relieve gikan sa maong police station ang sakop ni P/Major Rennel Serrano aron malikayan ang tensyon.
Nasayran sa ilang inisyal nga imbestigasyon nga gisugo matud pa ni Major Serrano si Police Staff Sgt. Mario Zapanta, Jr. nga atimanon una ang armas nga gi-turn over sa usa ka sibilyan ngadto sa ilang police station apan wala niini gihimo sa rasong wala matud pa siya masayod sa proseso nga maoy gikasuko sa opisyal.
Gawas sa pagpangulata, gidis-armahan pa og idinetine og pila ka oras sa ila mismong karsel ang maong pulis.
Sa eksklusibong interview sa Bombo Radyo Butuan, gipadayag ni P/Col. Perlas nga parehong duna’y sala ang duha og gipadayag niining tumong sa ilang imbestigasyon nga madetermina kung kinsa nila Serrano og sa sakop niini ang duna’y sala sa ingon mapasakaan na og kaso.
Samtang sa text message nga gipadala ni Serrano dinhi sa Bombo Radyo Butuan, gipadayag niining dili na siya magpa-interview pa tungod kay anaa na Fiscal’s Office ang kasong kriminal batuk sa iyang sakop.
