BUTUAN CITY- Nanawagan ang Department of Health kon DOH sa publiko nga palig-onon ang kahibalo ug preventive measures samtang gi-obserbar ang Colorectal Cancer Awareness Month karong bulan sa Marso.
Sumala sa advisory, ang kampanya nagtinguha sa pagpalapad sa kasayuran bahin sa paglikay, sayo nga pagdiskubre, ug husto nga pagtambal sa colorectal cancer, usa sa nag-unang hinungdan sa cancer-related deaths sa Pilipinas.
Ang sakit kasagarang makita sa mga tawo nga nag-edad og 50 anyos pataas ug mahimong magsugod sa polyps nga motubo sa colon o rectum.
Ang DOH nag-awhag sa pagpraktis sa himsog nga lifestyle sama sa pagkaon og fiber-rich foods, regular nga ehersisyo, paglikay sa sigarilyo ug sobra nga alkohol.
Samtang, gipahinumdom sa Philippine Health Insurance Corporation kon PhilHealth nga ang tambal sa colorectal cancer sakop sa Z Benefit Package kansa naghatag og coverage hangtod P400,000 depende sa stage ug klase sa tambal.
Sigon sa DOH nga ang sayo nga pagdiskubre ug tukmang pagtambal dako og tabang sa pagtaas sa survival rate ug paglikay sa komplikasyon.
