BUTUAN CITY – Emosyunal ang public school teacher nga garbo sa Caraga Region nga human siya napiling usa sa maglangkub sa Top 10 Outstanding Filipinos 2017 alang sa teacher category.
Sa eksklusibong pakighinabi sa Bombo Radyo kang Edgar Ilago, nga taga- Cabadbaran City, Agusan del Norte, gisugat gilayon siya sa nagpasiugda sa national competition sa iyang pagdalikyat sa kauluhan.
Dunay mga interviews nga kaniya og nahimo siyang emosyunal human gitunol ang sobre diin nakalatid nga siya sa napiling malakip sa Top 10 Outstanding Filipinos 2017.
Himoon ang awarding karung petsa Setyembre 2 ngadto sa 11 sa nagkalain-laing venues sa kauluhan sama nalang sa Malacanang, Senado, ug Kamara .
Plano karun ni Ilago nga gamiton ang madawat nga usa ka milyon ka pesos nga gante sa iyang community project scholars diin sa pagkakarun duna nay nag-pledge nga motabang sama sa mga pribadong indibidwal, private institutions, mga bangko ug foundation.
Gihimo matud pang basehan sa iyang pagkapili ang iyang Project Scholar nga nagtabang niadtong mga kabus apan adunay kakapas nga kabataan nga makapadayon ug makahuman sa ilang pagtungha.
Ilawom sa maong proyekto nga iyang gipasiugdahan, ubay-ubay na matud pa ang nahimong professional samtang ang uban anaa na sa college level sa ilang pagtungha.
Mitambag nalang kini sa tanang kabataan nga mahimong positibo sa kinabuhi ug dili magpawala sa paglaum bisan sa kalisud sa panahon aron kini makatapos sa pagtungha. (Rolan Janea)
