BUTUAN CITY – Giplanuhan karon sa kadumalahan sa Cebu Rufrance Multigas Corporation nga mupasaka og kasong pagpangawat ug harassment batuk sa Pryce Gas Incorporated ug sa raiding team human wala matud pa’y legal nga basehan sa pag-raid sa ginsakpan sa National Bureau of Investigtion kon NBI-Caraga, ang ilang tindahan sa may Guingona Subdivision sa Brgy. JP Rizal ning siyudad ning mi-aging adlaw.
Gawas niini, duha ka mga local media entities usab ang ilang apil sa kasuhan tungod sa pag-post matud pa nila og pagpaka-ulaw nga impormasyon subay sa alegasyong ilegal matud pang nag-refill og mga liquified petroleum gas kon LPG cylinders ang ilang kompanya.
Sa eksklusibong pakighinabi sa Bombo Radyo Butuan, gibutyag ni Atty. Arnel Awing, legal counsel sa maong kompanya, harassment ug pagpangawat ang gihimo sa mga otoridad ug sa Pryce Gas ngadto sa ilang tindahan tungod sa kawala’y saktong basehan sa ilang operasyon ug gipangbutang pa sa tindahan sa Pryce Gas sa Purok 4, Brgy. Taguibo ning siyudad sa Butuan.
Gihingusgan ni Atty Awing nga kawat ang gihimo tungod kay gipalit na sa ilang kompanya ang mga cylinders nga gipangdala sa ilang mga konsumidor padulong sa ilang tindahan pinaagi sa pag-swap niini sa ilang cylinder nga duna’y ilang trademark.
Legal matud pa kini base na sa Republic Act 11592 kon mas nailang LPG Industry Regulation Act, ang bag-ong balaud nga nag-regulate sa LPG industry.
Nakalatid matud pa sa maong balaud ang katungod ug kagawasan sa mga konsumidor pagpili sa LPG products nga gusto nilang paliton.
Ang gipagawas matud pa nga istorya sa Pryce Gas nga gisakyan usab matud pa sa pipila ka local media entities ning siyudad sa Butuan, wala matud pa gitugutan ang cylinder swapping kung wala’y kontrata.
Ang dapat matud pang buhaton sa Pryce Gas kung nakita nilang lehitimo ang ilang reklamo, mao ang pagpasaka og kaso batuk sa ilang kompanya apan gipangkuha niini ang mga cylinders nga duna’y ilang trademark taliwa nga gipalit na nila kini gikan sa mga kostumer nga mibalhin sa ilang produkto.
