BUTUAN CITY – Malampuson ang Pormal nga pag-abli kagahapong adlawa sa Provincial Government sa Agusan Del Sur nga “Kalinow Center”, usa ka Provincial Peace and Development Operations Center sa Agusan Del Sur Provincial Government Center sa Patin-ay, Prosperidad.
Ang maong kalihokan gitambongan sa mga opisyal nga naglakip nila Gobernador Santiago Cane, Jr., Secretary Carlito Galvez,Jr. gikan sa Office of the Presidential Adviser on Peace, Reconciliation, and Unity (OPAPRU), ug mga representante gikan sa Philippine Army, PNP, ug lain-laing opisina sa lokal ug nasudnong gobyerno.
Usa sa highlight sa maong kalihokan mao ang presentasyon sa 31 ka kanhi rebelde nga mibalik sa gobyerno.
Ang mga kanhi rebelde nakadawat og suporta gikan sa gobyerno isip kabahin sa programa nga nagtinguha sa pagpalambo sa kalinaw, panaghiusa, ug padayon nga kalamboan sa probinsya.
Sa nahimong mga mensahe, gipasabot ni Gobernador Cane ang kaimportante sa Kalinow Center sa pagpalambo sa malinawon ug mauswagong Agusan Del Sur, samtang gidayeg ni Kalihim Galvez ang panaghiusa sa mga stakeholder alang sa kalinaw ug kalamboan.
Tumong sa Kalinow Center nga mahimong sentro sa koordinasyon sa mga programa alang sa kalinaw ug kalamboan, suporta alang sa mga kanhi rebelde, ug pagpalig-on sa lokal nga gobyerno alang sa dugay nga kalinaw sa probinsya.
