BUTUAN CITY – Mismong si Presidential Communications Secretary Martin Andanar ang nangunay sa subling paglusad sa Provincial Communication Officers’ Network sa may Kapitolyo Probinsyal sa Agusan del Norte.
Sa eksklusibong pakighinabi ning sibyahan, giklaro sa Suriganon nga kalihim nga tumong niini nga mas sayon na unya ang pagsabwag sa mga impormasyon dinhi sa lalawigan og sa mga kalungsurang sakop niini ilabina kadtong gikan sa Malakanyang.
Nasayrang ang maong network una nang gilusad sa nasudnong kagamhanan niadtong tuig 2004.
Gawas sa impormasyong mapa-abot sa palasyo ngadto sa mga munisipyo, mas sayon na usab ang pagpa-abot sa mga reklamo gikan sa kalungsuran ngadto sa Malakanyang.
Gila-uman sa opisyal nga higayong matapos na ang paglusad niini sa tibuok nasud, mapahigayon gilayon nila sa unang bahin sunod tuig ang national convention uban na kang Pangulong Duterte.
Gipasabot sa kalihim nga gikan sa mga impormasyong ilang ipakanaog gikan sa palasyo, ipakanaog nila kini ngadto sa mga pronvincial, city og municipal information officers.
Gawas sa mga information officers, pakusgon usab nila ang Philippine Information Agency kon PIAs aron mu-abag sa ilang programa. (Beth Ruiz)
