BUTUAN CITY – Padayon karun ang imbestigasyon sa kapulisan sa Surigao City mahitungod sa pagpusil-patay ngadto kang Dinagat Island Provincial Board Member Wenefredo Olofernes.
Natigayon ang insedente kaganinang alas 7:00 sa buntag sa National Highway, Km-2, Barangay Luna, Surigao City.
Sigon ni Police Lt. Col. Randy Amaru, Hepe sa Surigao City Police Station, pauli na unta ngadto sa ilang balay sa Km-3, Barangay Luna sa maong dakbayan human gikan nag-exercise sa provincial gym ang biktima kauban ang iyang kapuyo sakay sa single motor kolor yellow apan pag-abot sa nahitaboan, gi-overtake-an sila sa single motor nga Honda Wave kolor itom, ug pabuto sa dalang pistola ang angkas niini.
Na-igo sa ulo ang board member rason sa ilang pagkatumba.
Daling misibat ang suspetsadong riding-in-tandem saw ala matinong direksiyun samtang ang biktima gidala usab sa Caraga Regional Hospital apan gideklara kining dead-on-arrival.
Sumala sa Hepe, walay nadawat nga hulga sa kinabuhi og walay nahibal-an usab nga naka-away ang biktima, base sa pag-asoy sa iyang kapuyo rasong hilabihan kakurat nalang kini sa panghitabo.
Nasayran nga ang biktimang si Provincial Board Member Wenefredo Olofernes, anaa na sa iyang ikaduhang termino diin midagan kini sa nakalabay nga piniliay isip independente og nanguna sa unang distrito sa probinsiya sa Dinagat Island.
