BUTUAN CITY – Ubay-ubay nga mga armas og mga bala ang nakumpiska sa mga otoridad human gi-serve ang search warrant kagahapon sa gipuy-an sa provincial assessor sa Agusan del Sur og sa konsehal sa lungsod sa San Francisco sa susamang lalawigan.
Kini tungod sa paglapas sa RA 10591 – usa ka akta alang sa komprehensibong balaud sa sa mga armas og bala og pagpahamtang og penalidad alang sa mga mulapas niini.
Unang gi-raid sa mga sakop sa Criminal Investigation and Detection Group kon CIDG-Caraga, Regional Public Safety Battalion kon RPSB-13 og kapulisan sa San Francisco, Agusan del Sur, kagahapon sa alas-sais sa buntag ang panimalay ni Engr. Ceasar Talaogon Rufila, 52-anyos, minyo og kasamtangang provincial assessor sa Agusan del Sur-LGU.
Sigon ni PRO-13 regional director Chief Supt. Noli Romana, naaresto sa operating teams si Rufila og nakuha gikan sa posisyon niini ang usa ka kalibre 45 nga pistola uban sa duha ka mga magazines, onse ka mga bala sa susamang armas og duha ka mga bala sa M203 grenade launcher.
Pagka alas-7:30 sa buntag gisunod pag-raid ang gipuy-an ni Bardo Cabuyao Bando kinsa naila usab nga si Datu Hag-um og alyas Kumander Kalbo sa Purok 1, Brgy. Alegria, San Francisco, Agusan del Sur, Nakuha gikan sa iyang gipuy-an ang usa ka M16 rifle og duha kalibre 45 nga pistola, duha ka 12 gauge shotguns uban sa tulo usab ka shotgun magazine assemblies, walo ka M16 magazines gawas pa sa unom ka mga buhing bala sa shotgun, 154 ka mga live rounds ammunitions sa M16 og usa ka M16 carrier bag.
Bisan pa man sa nakumpiskang mga armas og mga bala, wala gihapon madakpi si alyas Kalbo tungod kay wala kini sa maong pinuy-anan atol sa raid hinungdan nga pabilin siyang at large.
Nasayrang si alyas Kalbo kinsa usa ka kanhi lider sa rebeldeng New People’s Army kon NPA, ex-officio member karon sa Sangguniang Bayan sa San Francisco, nagpuyo sa farm ni Engr Rufila sa Barangay Alegria.
