BUTUAN CITY – Gipalagan sa mga Mindanaoans ang matud pa, pag-inarte sa mga magtutungha sa University of the Philippines kon UP nga naglusad og Peace and Justice candle-lighting action isip pagkondena nila sa pagpa-ilalom ni Pangulong Rodrigo Duterte sa Mindanao sa balaud-militar human ang pag-atake sa teroristang grupong Maute sa Marawi City, Lanao del Sur.
Mahinumdumang niadtong Mayo 24 gihimo sa mga UP students ang ilang aksyon sa Bulwagang Palma sa rasong dili matud pa solusyon ang martial law sa problema sa katawhan og hinuon, makadugang lang matud pa kini sa mga kasong paglapas sa tawhanong katungod.
Sa maong kalihukan, nagdagkot og kandila ang mga misalmot human sa programa isip pakighi-usa og pagpa-abot sa ilang pahasubo ngadto sa mga biktima og sa mga namatay sa maong pagpangatake.
Apan gi-ulan og mga pagkondena gikan sa mga Mindanaoans ang mga estudyante sa rasong sila pa ang nagreklamo taliwa nga pabor niini ang halos tanang mga Mindanaoans, mga opisyal man sa kagamhanan o kaha mga sibilyan tungod kay secure ang taga-Mindanao human sa deklarasyon sa pangulo.
Kadaghanan sa mga Mindanaon netizens suko nga nag-post sa ilang reaksyon sa social media nga nagkondena sa gihimo sa mga UP students nga mao matud pa’y nagpa-Epal alang sa mga Mindanaoans taliwa nga dili sila ang apektado.
Apela usab sa mga Mindanaoans nga unta suportahan na lang sa mga taga-Luzon og mga taga-Visayas ang kagamhanan og muhatag na lang og suhestyon sa angayang buhaton og dili kay puro na lang batikos ang himuon taliwa nga wala’y reklamo sa martial law ang mga Mindanaoans. (Beth Ruiz)
