BUTUAN CITY – Gibalikan sa International Criminal Court (ICC) Office of the Prosecutor ang nahimong sistema sa kampanya batuk sa ilegal nga droga sa administrasyon ni kanhe Pangulong Rodrigo Duterte.
Sa confirmation of charges hearing sa kanhe pangulo, gitumbok ni Julian Nicholls, senior trial lawyer sa Office of the Prosecutor, ang lapad nga pagpatay sa Davao City nga gipatuman ni Duterte isip framework sa iyang drug war, human siyang mapili isip pangulo sa Pilipinas.
Nakita matud pa ni Duterte kung unsa kaepektibo ang iyang “style” sa Davao City ug gigamit kini isip political strategy aron modaug sa usa ka national position, kalakip ang saad nga pat-yon usab niya ang mga drug personalities sa nasud.
Sumala sa abogado, nahimong klaro kang Duterte nga ang iyang gipatuman nga strategy maka-angat kaniya aron mahimong pangulo.
Sa dihang hingpit nang napili, gipatuman niya ang saad nga mopatay og daghang Pilipino.
Gipangunahan kini sa iyang gimugna sa Davao nga gibitbit sa national office—ang liquidation squad nga naila karun isip Davao Death Squad (DDS).
Sumala ni Nicholls, dili lang ang DDS framework ang gidala sa kanhe pangulo sa nasudnong lebel; giapil usab niya ang mga personalidad nga ang-unang nagpatuman niini sa Davao City.
Lakip sa mga nasangpit nga personalidad, naapil na sa listahan sa mga co-perpetrator.
Ang makasusubo, liboang Pilipino ang napatay sa katibuk-an sa iyang pagdumala ug wala nakita sa kanhe pangulo ang pagbasol sa iyang gihimo hinoon gipanghinambog kini.
Samtang alang usab sa panig sa depensa, gibutyag ni Atty. Alfredo Lim Jr. nga naka-abanse ang Duterte side, human mapakita ni Nicolas Kaufman ang bug-at nilang argumento mahitungod sa panig sa kanhe chief executive.
