BUTUAN CITY-Base sa bag-ong pagtuon sa marine advocacy group nga Oceana, ang Pilipinas nagkawala og isda nga katumbas sa usa ka puno nga jumbo jet matag adlaw. Kini nga pagkawala naghulga sa food security sa nasud, panginabuhi sa mga coastal communities, ug sa kaugmaon sa fisheries.
Nanawagan ang Oceana kang Presidente Ferdinand Marcos Jr. nga ideklarar ang fisheries ug food security emergency, tungod kay ang dekada sa kahuyang sa pagpangpatuman ug kapakyasan sa pamalaod nakapahulog sa fish stocks ngadto sa giingong “free fall.” Matod sa Oceana, ang tinuig nga pagkawala sa 45 milyon ka kilo nga isda katumbas sa pag-empty sa usa ka jumbo jet matag adlaw.
Ang report nagpakita nga sukad 2010, hapit 600,000 metric tons nga potensyal nga huli ang nawala — igo unta nga makahatag og pagkaon sa matag Pilipino sulod sa usa ka bulan.
Sumala sa datos sa gobyerno, 88% sa fish stocks sobra na sa pagpangisda ug depleted. Ang total production mikunhod gikan sa 2.6 milyon metric tons niadtong 2010 ngadto sa 1.9 milyon metric tons sa 2023. Ang satellite monitoring nakadetect usab og libo-libong night lights nga timailhan sa commercial fishing activity sa mga lugar nga gireserba unta para sa gagmay nga mangingisda.
