BUTUAN CITY – Giklaro ni Kapitan Irene Monden sa Brgy. Los Angeles ning siyudad sa Butuan nga duna na sila’y gihimong aksyon kaniadto pa batuk sa gireklamo sa iyang mga residente nga Sentro poultry farm tungod sa dili maayong pagdumala niini nga miresulta sa fly infestation kon pagdagsa sa bagang duot sa mga langaw ug kabaho sa palibot tungod sa dili maayong pagka-dispose sa namatay nga libuan nilang mga manok.
Sa eksklusibong pakighinabi sa Bombo Radyo Butuan, gibutyag ni Kapitan Monden nga ang tanang mga reklamo sama sa wala maayo paglubong sa libuan ka mga manok nga nangamatay hinungdan sa mi-alisbong ngil-ad nga baho ngadto na sa pagdagsa sa mga langaw, iya nang gipa-atiman ni Kagawad Simon Cane isip chairman sa Committee on Environment sa Sangguniang Barangay.
Gani iya na usab kining gipa-abot sa City Health Office kondiin gisugyot kaniya nga magduso lang sila og formal complaint nga maoy gipahimo niya sa mga tawo.
Samtang gibutyag usab ni Kagawad Simon Cane, chairman sa Committee on Environment sa Sangguniang Barangay, iya nang giduol ang manukan kondiin iyang nasuta ang sayop nga pag-spray sa mga langaw tungod kay inay unahon ang gawas nga bahin, mas gi-una na hinuon niini ang sa sulod.
Kini gawas pa sa wala pagsunod sa maong manukan sa nasabutan aron unta malikayan ang pag-espongha sa baho gikan sa ilang mga waste materials ilabina ang paglubong sa mga patay na nga manok apil na ang pagdagsa sa mga langaw nga maoy gireklamo sa mga residente.
Aron ma-aksyunan og sakto, iya nang gipaduso og formal complaint ang mga residente sa ingon mahatagan na og katapusan ang nasangpit nga isyu.
