BUTUAN CITY – Mikunhod na ang presyo karon sa ginadiling drugas dinhi sa rehiyon sa Caraga. Kini ang gikumpirma sa buhatan sa Philippine Drug Enforcement Agency ( PDEA ) – Caraga.
Sa pakighinabi ning sibyahan, gibutyag ni Dindo Abellanosa, information officer sa maong buhatan, nga tungod matud pa sa hugot nga kampanya sa gobyerno batuk sa iligal nga drugas, ubay-ubay na matud pa ang nangundang nga mga parokyano niini kaniadto tungod sa kahadlok nga basin sila ma-tukhang.
Tungod sa maong sitwasyon, gihimong barato na lamang sa mga tigpayuhot niini ang presyo aron nga maka-aghat niadtong mga nangundang na sa subling pagpalit ug paggamit niini.
Matud pa nga base sa ilang na-obserbahan, anaa na lamang matud pa sa 5-mil pesos matag gramo ang presyo niini karon gikan sa tag- 11,800 pesos kaniadto.
Subay niini, giangkon sa maong opisyal nga bisan paman sa hugot nga kampanya sa gobyerno batuk sa ginadiling druga karon, apan aduna pa gihapo’y tiggamitan niini. Maoy hinungdan nga magpadayon usab gihapon sila sa ilang kampanya alang sa hingpit nga pagsumpo niini. (Mon Aplaya)
