BUTUAN CITY – Lauman ang posibleng pagsutoy sa presyo sa diesel sa 170 pesos kada litro karun nga semana samtang padayon nga mitaas ang pangkalibutanong presyo sa lana nga epekto sa padayon nga giyera sa Middle East.
Base sa source gikan sa oil industry, mamahimong P17 hangtud P19 ang dugang nga ipatong sa presyo sa diesel sa Abril 7 samtang gikan sa P3 hangtud P5 kada litro usab sa gasolina.
Ang paglihok sa presyo mas taas sa milabay nga semana, nga miabot og P4.50 hangtod P12.90 kada litro para sa diesel ug P1 hangtod P2.90 kada litro para sa gasolina.
Sa price monitoring sa Department of Transportation (DOTr) gikan Marso 24 hangtod 30, ang regular diesel anaa sa P105 hangtod P131.90 kada litro, samtang ang premium diesel anaa sa P119.50 hangtod P140.20 kada litro.
Samtang ang gasolina nagrange gikan P84 hangtod P111.10 kada litro.
Tungod sa taas nga demand sa diesel, sumala sa usa ka source, padayon nga mosaka ang presyo bisan pa sa limitasyon sa suplay, hangtod nga dili pa ma-ablihan ang Strait of Hormuz nga ruta sa pagkuha og lana gikan sa Persian Gulf, nga maoy nag-unang gigikanan sa Pilipinas.
Tungod niini, gipasalig sa Department of Energy (DOE) nga magpatuman sila og mas hugot nga aksyon batok sa hoarding sa mga produktong petrolyo sa merkado.
