BUTUAN CITY – Duna na’y ‘person of interest’ ang Presidential Task Force on Media Security nga maoy ilang panubayan subay sa pagpusil-patay sa komentaristang si Christopher Lozada.
Kini ang gikumpirma sa hepe sa maong task force nga si Usec. Joel Maquiza Sy Egco sa eksklusibong pakighinabi sa Bombo Radyo.
Gibutyag ni Usec. Egco nga dihang naka-abot kaniya ang taho nga duna’y hulga sa kinabuhi nga nadawat si Lozada human ang pagpasaka niini og kaso ngadto sa Ombudsman, nakig-alayon gilayon siya niini.
Gipangkuha gilayon niya gikan mismo sa maong komentarista ang mga mahinungdanong detalye nga maoy ilang tutukan sa himuong imbestigasyon,.
Gidugang pa niini nga dihang naka-abot kaniya ang impormasyong duna kini nadawat nga hulga sa kinabuhi, duha ka higayon gilayon niya kining gihanyag og security escorts apan pareho kining gibalibaran ni Lozada hangtud nga nasayran na lang niyang gipusil-patay na kini kagabii.
Gidugang pa sa opisyal nga iya pang gipadalhan og sulat ang maong person of interest kagahapon sa buntag apan wala matud pa kini paka-abot ngadto sa iyang gipadalhan hangtud nga na-abtan si Lozada sa iyang kamatayon.
Unod matud pa sa suwat ang pagbahad niya sa person of interest nga dili buhatan og dautan si Lozada apan tungod kay na-unhan sila sa maong hitabo, gimanduan niya ang kapulisan nga imbestigahan og maayo ang kamatayon sa biktima.
Personal usab siyang mubisita sa Bislig City aron mahihimat ang mga tawong andam muhatag sa ilang testimoniya nga makatabang paghatag og hustisya sa nadangatan ni Lozada. (Beth Ruiz)
