BUTUAN CITY- Gipasabot sa Presidential Communications Office (PCO) ang mikaylap nga video kondiin makita ang usa ka indibidwal nga duna’y gitunol sa kamot ni Pangulong Ferdinand Marcos Jr. atol sa usa ka okasyon kansa gikumot usab sa pangulo ug daling gisulod sa bulsa. Sa video nga gi-post, nanawagan ang PCO sa publiko nga mag-igmat sa kanunay ug dili mutuo gilayon sa opinyon sa kadaghanan ilabina ang pasi-atab nga ilegal nga druga kini.
Gipasabot sa PCO nga usa lang ka lapel pin nga duna’y simbolo sa ilang politikal nga partido ang gitunol sa usa ka sibilyan kinsa naghulat nga makapa-selfie sa pangulo. Sigon sa PCO, gigamit sa pipila ka mga indibidwal ang mga ingon niini nga content aron matud pa, makapakaylap og sayop nga naratibo.
Tungod matud pa sa pagputol ug pag-blur sa video ug paghatag og sayop nga context, nanglutaw ang nagkada-iyang opinyon sa mga netizens. Tungod niini, gi-awhag sa PCO ang publiko nga maghuna-huna una og maayo, sayron ang tibuok istorya, obserbahan ang mga detalye, ug dili magpabiktima sa fake news.
