BUTUAN CITY- Ubay-ubay nga mga lugar sa Caraga ang nakasinati og pagbaha ug pagdahili sa yuta kagahapong adlawa.
Una niini ubay-ubay nga mga residente Surigao del Norte ang naghikling sa mas luwas nga lugar human ang natigayon nga pagbaha mugna sa walay hunong nga pag-ulan.
Una nang nanawagan si Governor Francisco Matugas sa mga residente nga anaa sa flood ug landslide prone areas nga mubakwit sa mga evacuation centers nga gi-identify na sa mga local government units human nga gipa-ilalom sa orange rainfall warning ang lalawigan tungod sa pila ka adlaw na nga pag-ulan.
Gawas sa Surigao del Norte gibaha usab ang ubang bahin sa Surigao del Sur ,labi na sa lungsod sa Cantilan human gibundakan sa kusog nga pag-ulan diin lakip sa mga naapektuhan ang usa ka eskwelahan sa maong lungsod partikular sa Purok 4 Magasang, ug Purok Pag-antayan diin aduna usab mga residente ang gipanghikling tungod sa taas nga tubig-baha.
Gawas sa mga pagbaha aduna usaby natigayong landslide sa Malimono, Surigao del Norte diin apektado ang provincial road sa barangay Pili.
Misaka usab ang tubig sa Hanagdong bridge ingun man ang Tinago river sa susamang lungsod.
Mibaha usab sa barangay Bunga, sa Jabonga Agusan del Norte human mi-overflow ang tubig sa Lake Mainit sa nasinatiang walay hunong nga pag-ulan tungod sa epekto sa Northeast Monsson.
Una niini nag-abiso ang National Disaster Risk Reduction & Management Council kon NDRRMC og Orange Rainfall Warning sa Dinagat Islands, Surigao del Sur, Surigao del Norte ug Agusan del Norte kansa una nang na-grabehan usab sa pagkuso-kuso sa bagyong Odette.
