BUTUAN CITY – Gidugok sa liboan ka mga tawo ang gihimong prayer rally kagabii sa may Sports Complex sa Barangay Libertad ning siyudad sa Butuan kagabii isip pakighiusa sa pagselebrar sa ika-80 nga adlaw nga natawhan ni Kanhi Pangulong Rodrigo Duterte.
Napuno ang maong sports complex diin duna pay mitambong nga nagsumikad sa kasikbit nga mga lugar sama didto sa Agusan Del Sur. Lakip na niini si Ronald Ampo nga taga Nasipit, Agusan Del Norte.
Sumala pa niini sa eksklusibong pakighinabi sa Bombo Radyo Butuan, miduyog siya sa prayer rally isip pagsuporta kang Kanhi Pangulong Digong og sa iyang pamilya.
Kini ilabina kay napuno nalang sa paglutos ang kasamtangang administrasyon ngadto sa mga Duterte rasong wala na napadagan og maayo ang nasud. Kamatooran matud pa niini ang walay nahimong proyekto.
Ang gikasakit lang niini kay ilang gipadala si Digong ngadto sa International Criminal Court. Sumala pa niini, kung duna may sala ang Kanhi Pangulo, nganung dili man kini taralon dinhe sa atong nasud.
Mensahe nalang niini ngadto sa Kanhi Presidente nga lauman ang ilang padayong pagsuporta dayung panghinaot nga makabalik na kini sa Pilipinas.
Si Ronald Ampo.
Sa kabahinan usab ni Former Kagawad Datumanong Mamongcara, iyang gi-ampo ning patapos nga Ramadan nga makauli na sa nasud si Kanhi Pangulong Duterte, og makabaton sa maayong panglawas.
Gitumbok usab ning Mamongcara ang rason sa ilang pagsinggit nga makabalik sa kadumalahan sa nasud ang mga Duterte, lakip na niini ang pagbalik sa ilegal nga drogas.
