BUTUAN CITY – Mi-apela ang Department of Tourism kon DOT-Caraga ngadto sa tanan ilabina sa mga Butuanon nga hatagan una og higayon ang Municipal Tourism Office sa lungsod San Agustin, Surigao del Sur kalabot sa ilang post kagabii nga mi-ani og batikos sa mga netizens.
Kini subay na sa gi-post nilang announcement sa ilang Facebook page nga nagpahibalo sa tanan nga bukas na sugod kagahapon ang Britania Island sa Brgy. Britania sakop sa maong lungsod alang sa mga musuroy nga turistang Caraganons gawas lang sa mga taga-Butuan.
Pila ka minutos lang sukad kini gi-post, mi-ani gilayon kini og wala’g tuo nga batikos gikan sa mga netizens tungod sa ka-insensitive matud pa sa maong anunsyo nga daw nakatamay og maayo sa mga Butuanons.
Sigon ni DOT-Caraga OIC regional director Mary Jean Camarin sa eksklusibong pakighinabi sa Bombo Radyo Butuan, dali niyang gitawagan ang tourism officer sa maong lungsod dihang iyang nakita ang post og aminado matud pa ang opisyal nga duna’y sayop sa announcement ilabina nga wala magpagawas og resolusyon ang municipal council alang sa ingon niini nga pahibalo.
Kini matud pa ang rason nga nagtigom ning adlawa ang local tourism office ug mga local officials aron hisgutan ang nasangpit nga kasaypanan ug kini makurihi-an.
Giklaro usab sa opisyal nga base sa MECQ guidelines sa Inter-Agency Task Force kon IATF, tugutan na ang mga tourism activities ug bahala na ang hingtungdang local government unit kung buksan na nila kini sa publiko o dili.
Alayon niini, mi-apela usab siya sa mga Butuanon nga hatagan una og higayon ang maong buhatan pagkuriher sa ilang sayop dayong panawagan sa tanan nga dili na kini dagkutan pa.h Hinun mas maayong tas-an ang pasensya aron dili kita magkabahin-bahin ilabina ning panahon sa pandemya.
