BUTUAN CITY – Nanawagan si Pope Francis nga tapuson na ang kapintas ug pagpatay sa mga sibilyan sa North Kivu, probinsya sa sidlakang bahin sa Democratic Republic of Congo kansa grabeng na-igo sa gubat.
Ning bag-o lang, dili moubos sa pito ka mga tawo ang patay human nagprotesta kontra sa pagsaka sa ihap sa atake sa mga gitu-ohang rebeldeng Islamista.
Sumala sa Santo Papa, sakit pamalandungon ang padayong pag-atake ug pagmasaker sa katawhan sa maong bahin sa Congo hinungdan nga nanawagan siya sa nasyonal nga otoridad ug internasyonal nga komunidad nga buhaton ang tanan aron mahunong na ang maong gyera ug panalipdan ang kinabuhi sa mga sibilyan.
Nanawagan usab si Pope Francis alang sa kalinaw sa Ukraine, Israel ug mga teritoryo sa Palestinian, Sudan, Myanmar ug bisan asa nasud diin nag-antos ang mga tawo tungod sa gubat.
