BUTUAN CITY – Padayon pa ang lawom nga imbestigasyon sa kapulisan sa Surigao City human nadakpan sa kapulisan kagahapon sa alas-singko sa hapon sa Brgy. Rizal, Surigao City ang political officer sa rebeldeng New People’s Army kon NPA.
Sigon ni Lt. Col. Rico Amaru sa 30th IB, Philippine Army, nadakpan si Rubilyn Mahinay alyas Ka Apple tungod sa tulo ka mga warrants of arrest nga gi-isyu ngadto kaniya sa mga kasong rebelyon og trustrated murder.
Sa eksklusibong pakighinabi ning subayahan, gipadayag ni Col. Amaru nga gikan matud pa sa Surigao del Sur si Apple og gipadala sa lalawigan sa Surigao del Norte aron mutabang pagpakusog sa pwersa sa mga rebelde sa maong lalawigan.
Gipasabot sa opisyal nga trabaho ni Ka Apple ang paggiya sa iyang mga armadong ka-ubanan og pagpahigayon og lecture kalabot sa gustong mahitabo sa partidong komunista.
Ang pagtabok matud pa ni Ka Apple posibleng nagtimaan nga nagkulang na ang pwersa sa rebeldeng grupo tungod kay gipatabok naman kini sa dili niya area of assignment aron lang pakusgon ang grupo nila sa Surigao del Norte.
Nakuha gikan sa iyang posisyon sulod sa bag ang blasting caps og landmine nga anaa sulod sa gi-abangan niyang pinuy-anan. (Beth Ruiz)
