BUTUAN CITY – Mi-ani og mga pagdayeg ang usa ka police non-commissioned officer kon PNCO sa Tandag City Police Office human nakita sa mga netizens ang ilang post kondiin iyang gipasuso ang usa ka buwang bata nga gibitbit sa inahang duna’y post-partum depression.
Sa eksklusibong interview sa Bombo Radyo Butuan, gipadayag ni PO2 Rochelle Gordo kinsa na-assign sa administrative division, nga midangop sa ilang Women and Children’s Protection Desk ang usa ka grade 12 pa lang nga inahan aron ireklamo ang planong pagkuha matud pa sa iyang inahan sa iyang anak.
Nagproblema matud pa ang iyang mga ka-ubanan nga mi-entertain sa minor-de-edad nga inahan tungod sa pagpunay na og hilak sa usa ka buwan pa lang nga batang lalaki nga klarong gigutom.
Isip mother’s instinct tungod sa pagbaton pa usab niya og walo ka buwang anak, dinhi na niya gipasuso og pila ka oras ang bata hangtud nga kini nabusog.
Gidugang pa ni PO2 Gordo nga dili kini ang unang higayon nga nagpadede siya og dili niya anak tungod kay kini na ang ika-unom ka higayong nabuhat niya kini.
Base sa iyang nasayran, na-trigger matud pa ang sakit sa inahan dihang sa paggawas niini sa ospital gikan nanganak og pa-uli na unta sa ilang balay, hapit nabanggaan sa usa ka motorsiklo ang iyang gisakyang traysikol. (Beth Ruiz)
