BUTUAN CITY – Hingpit na matud pang preparado og andam na nga molihok ang Police Regional Office kon PRO-13 aron pagseguro sa luwas, protektado og malampuson ang pagpahigayon sa 2026 Palarong Pambansa sa rehiyon sa Caraga.
Sumala sa impormasyong gipaabot niini, nagbutang na matud pa ang kadumalahan sa PRO-13 og comprehensive ingon man intelligence-driven security measures aron pag-protekta sa mga competition venues, billeting areas, tourist destinations, og dagkong transportation terminals.
Lauman matud pa sa publiko ang gipakusgan nga police visibility, gipahugtan nga inter-agency coordination, og responsive security operations sa tanang panahon sa maong kaihukan.
Apan bisan paman nga walay namonitor nga hulga nga makahatag og alarma, ang Police Regional Office kon PRO-13 nagpabiling naka-heightened alert og padayon ang hugot nga pag-monitor sa sitwasyon aron maseguro ang kaluwasan sa publiko.
Gibutyag sa PRO-13 ang pinakataas nga prayoridad sa safety og security sa mga atleta, delegasyon, officials, mga bisita og residente.
Gi-aghat usab ang publiko nga magpabiling alerto og itaho ang bisan unsang kadudahang tawo o aktibidad ngadto sa pinakadool nga police station o pinaagi sa official PNP hotline numbers.
Mihangyu usab kini og pagtinabangay sa tanan aron masiguro ang malinawon ug malampusong 2026 Palarong Pambansa, samtang ipakita ang panaghiusa, kaandam, ug mainiton nga pag-abiabi sa Rehiyon sa Caraga.
