BUTUAN CITY – Nagpadayon pa ang hot pursuit operation sa kapulisan sa lungsod sa Bunawan, Agusan del Sur ug sa Police Provincial Office batuk sa misibat nga pulis human niini gipusil ang iyang force commander nga si Lt. Colonel Rex Lomente sa 2nd Agusan del Sur Provincial Mobile Force Company nga nakabase sa Brgy. Bunawan Brook sa maong lungsod.
Sa eksklusibong interview sa Bombo Radyo, gipadayag ni Agusan del Sur Police Provincial Director Col. Ringo Zarsozo nga pasado alas-9:55 kagabii dihang gipatawag sa buhatan ni Col Lomente ang suspek nga si Patrolman Jhon Paul Gerida, upat ka tuig na sa serbisyo ug residente sa Purok 6, Brgy. Taganito, lungsod sa Claver, Surigao del Norte.
Migawas sa ilang imbestigasyon nga paglabay matud pa sa pipila ka minutos, nadunggan na lang sa ilang mga ka-ubanan nga milanog na ang buto sa armas ug nakita na lang anga nagbuy-od na ang biktima kinsa daling gidala sa Bunawan District Hospital ug gi-refer sa Agusan del Sur Provincial Hospital hangtud nga gidala na sa Southern Philippines Medical Center aron operahan sa iyang ulo.
Padayon pa usab nga gipakisayran ang hinungdan sa pagpusil sa suspek ngadto sa iyang senior officer.
