BUTUAN CITY – Gibarugan ni Senador Christopher ‘Bong’ Go ang panultihong ‘Too late the hero,’ ang gihimong imbestigayon sa Senate Committee on Foreign Relations dayong butyag nga wala lang gihapon kini pulos, kung dili gihapon mapapa-uli dinhi sa nasud si kanhi Pangulong Rodrigo Duterte.
Sa iyang online nga pagtambong sa pagdungog, gipadayag ni Senador Bong Go nga bisan og gidayeg niya ang gihimo ni Senador Imee Marcos, apan ulahi na ang tanan kansa dili madawat sa katawhang Filipino ilabina nga 80-anyos na kini ug duna na’y gihambing sakit.
Hagit na lang niini sa gobyerno nga ibalik nila sa nasud ang kanhi pangulo sa labing dali nga panahon sama kadali sa ilang pagpadala niini ngadto sa The Netherlands.
Ang iyang gikadismaya tungod kay wala iya pasudla sa airport diin atua ang pangulo aron mahatag ang iyang tambal ug masusi sa iyang mga doktor ilabina nga duna siya’y scheduled check-up pagkasunod adlaw.
Importante matud pa masusi ang iyang panglawas ilabina nga 80-anyos na kini. Gihikaw matud pa sa mga otoridad ang mga katungod sa kanhi pangulo alang sa iyang maayong panglawas, apil na ang kagustuhan niining maka-istorya ang iyang anak nga abogado.
Partikular pa niyang gikahi-ubsan si PNP spokesperson PBGen Jean Fajardo tungod sa duha ka higayong pagpamakak kaniya ug wala pagrespeto sa tawhanong katungod ug wala man lang pagtubag sa iyang hangyo nga kung nahimo kaniya isip senador, seguradong mahimo usab niini sa ubang mga tawo.
