BUTUAN CITY – Pormal nang milingkod isip bag-ong hepe sa Philippine National Police kon PNP si Police General Nicolas Torre III human sa gipahigayong change of command ceremony sa Camp Crame kaganinang buntag. Gihulipan niya si Police General Rommel Francisco Marbil, kansang termino gilugwayan hangtud sa Hunyo 7.
Si Torre isip hepe sa Criminal Investigation and Detection Group kon CIDG, maoy nanguna sa pag-aresto kang kanhi Pangulong Rodrigo Duterte ug sa pagbiyahe niini padulong ngadto sa International Criminal Court sa The Hague, Netherlands niadtong Marso 11 tungod sa gi-atubang matud pa niining kasong crime against humanity.
Nagsilbi usab siyang director sa Police Regional Office 11 kondiin siya ang nanguna sa pag-aresto kang Kingdom of Jesus Christ founder Apollo Quiboloy niadtong September 8, 2024 sa Davao City tungod sa gi-atubang niining mga kasong human trafficking ug sexual exploitation of minors. Nagsilbi usab siyang Communications and Electronics Service director sa PNP gikan niadtong Abril 3 hangtud Hunyo 17, 2024 ug nahimo pang hepe sa Quezon City Police District gikan sa August 8, 2022 hangtud August 30, 2023.
Milingkod siya isip CIDG chief gikan sa Septembre 25, 2024 hangtud sa iyang pagkatudlo isip PNP chief.
Ang 54-anyos nga si Torre, migradwar sa iyang Bachelor of Science in Public Safety degree sa Philippine National Police Academy niadtong 1993 ug gipanganak siya sa Jolo, Sulu. Misaad kining patubagon sa ilang mga sala ang mga nakasala sa balaud tungod kay komitido siyang himuon ang angayang buhaton sa usa ka pulis.
