BUTUAN CITY – Andam na ang Philippine National Police (PNP) nga moatubang sa imbestigasyon sa Senado kalabot sa pag-serve sa warrant of arrest batok sa lider sa Kingdom of Jesus Christ (KOJC) nga si Pastor Apollo Quiboloy ug ang pagpangronda sa iyang mga propyedad sa siyudad sa Davao.
Kini human gitumbok ni Senador Robin Padilla sa imbestigasyon ang posibleng paglapas sa tawhanong katungod sa mga operasyon nga naglambigit sa kapin 100 ka police personnel.
Sumala ni Philippine National Police spokesperson Col. Jean Fajardo, usa kini ka maayong kahigayonan nga madungog ang ilang habig sa tinuod nga nahitabo.
Hugot usab ang pagtuo sa nasudnong kapolisan nga balido ang operasyon sa kapolisan niadtong Hunyo 3.
Dugang ni Col. Fajardo nga maayo ang plano sa operasyon aron malikayan ang tensiyon ug kapintasan.
Nagpasalamat usab kini nga bisan pa sa tensiyon, walay grabeng naangol sa maong insidente.
Gipahibalo usab sa maong opisyal nga abli kanunay ang PNP kung boluntaryong mosurender si Pastor Quiboloy ug uban pang kaubang akusado niini sa kasong sexual ug child abuse ingon man human trafficking.
Kahinumdumang gisuhid sa kapolisan ang mga propyedad sa maong Pastor sa Buhangin, Davao City ingon man sa Prayer and Glory Mountains sa Barangay Tamayong, apan wala gihapon nila nakita ang Pastor sa maong mga dapit.
Ang maong operasyon nakamugna og tensiyon tali sa kapolisan ug sa mga sumusunod ni Pastor Quiboloy nga nisangpot sa pagsaway ni kanhi Presidente Rodrigo Duterte kinsa gitawag ang maong operasyon nga overkill.
