BUTUAN CITY – Pipila ka mga police personnel, police units ug mga stakeholders ingon man mga non-government organizations ang gipasidunggan sa Police Regional Office-13 kaganina atol sa pagsa-ulog sa Philippine National Police kon PNP Day nga gi-atol na lang usab sa flag raising ceremony sa may PRO-13 Grandstand, Camp Col. Rafael C. Rodriguez, ning siyudad sa Butuan City.
Nagsilbing guest of honor ug speaker si National Police Commission kon NAPOLCOM Director Josephmar Gil.
Dinhi sa dakbayan sa Butuan, ang Butuan City Police Office kon BCPO maoy napiling Best City Police Office, kansang award gidawat ni PCOL Restituto Lacano Jr., isip pag-ila sa padayong paningkamot nga mamintina ang kahapsay ug kalinaw sa siyudad, malikayan ang mga krimen ug mapalig-on ang community partnerships.
Samtang ang Butuan City Mobile Force Company, mao usa’y napiling best city mobile force company isip pag-ila sa ilang dedikasyon, disiplina ug operational excellence.
Gihatagan usab og pag-ila ang lokal nga kagamhanan sa Butuan City tungod sa padayon niining suporta ug hugot nga kooperasyon tali sa PNP sa pag-promote sa kahapsay ug kalinaw sa siyudad.
