BUTUAN CITY – Ubay-ubay nga mga plaka sa mga motorsiklong ‘for registration’ pa, ang gipang-release sa Land Transportation Office kon LTO-Caraga ning adlawa sa nagkada-iyang lugar sa rehiyon subay sa ilang gilusad nga ‘Oplan : Stop, Plate and Go.’
Sigon ni Atty Noel Aban, ang hepe sa Legal/Operation Division sa maong buhatan, ang maong mga backlog plates, naggikan pa niadtong tuig 2014 hangtud sa kasamtangan kansa wala ma-release sa ilang buhatan.
Sa eksklusibong pakighinabi sa Bombo Radyo Butuan, gibutyag sa opisyal nga kini gawas pa sa regular nga pag-release nila og mga plaka sa ila mismong mga district offices aron mapaspasan ang paghatag niini.
Gila-uman sa opisyal nga mahurot na nila kini og hatag sa usa ka buwan aron hingpit na nilang mapatuman ang ‘No Plate, No Travel’ policy sunod buwan.
Giklaro pa ni Atty Aban nga apil sa maka-avail niini kadtong mga motorsiklo nga wala pa’y na-assign nga plate number kondiin mas dali ang ilang proseso.
Naka-avail usab niini kadtong wala pa mabutang sa ilang certificate of registration kon CR ang ilang plaka apil na kadtong ang ilang plaka duna’y pito ka mga number nga alpha numeric ang nakalatid.
Bugtong nilang pangitaon gikan sa mga motorista mao ang CR ug official receipt sa sakyanan tungod kay mao man kini ang i-encode aron mahimo nang opisyal ang numero nga i-assign sa motorsiklo.
Dugang pa ni Atty Aban, synchronized nila kining gihimo sa ilang mga district offices kondiin duna’y mihimo usab niini sa nagkada-iyang lugar ning rehiyon.
Alayon sa padayon nilang pag-release sa mga plaka, nanawagan siya sa tanang wala pa’y plaka ang motorsiklo nga mu-avail niini tungod kay gawas nga dali ra ang proseso, wala usa’y bayaran ang mga nanag-iyang og motorsiklong ‘for registration’ pa.
