BACOLOD CITY – Nagapabilin sa 50:50 ang posibilidad sang pagbungkag kag pagpabilin sang Negros Island Region.
Ini ang ginpahayag ni Atty. Hesus Hinlo, ang undersecretary for operations sang Department of Interior and Local Government.
Suno kay Hinyo, tubtob subong wala pa napirmahan ni Presidente Rodrigo Duterte ang executive order nga nagabungkag sang NIR kag natalana pa nila ini nga hambalan sa patigayunon nga Cabinet Meeting sa bulan sang Disyembre.
Apang sa wala pa, madamo na sang tiglikom nga nagpabutyag sang suporta kag nagpasalig nga magabulig sila sa pagkumbinser sa presidente nga indi pagdulaon ang NIR.
Sa bahin sang department of Tourism, ginpahayag ni Assistant Sec. Daniel Angelo Mercado nga ila ini pagatalakayon sa maabot nga mancom meeting sa Nobyembre 22.
Apang sa personal sini nga pagpang-ino-ino, luyag sini nga ipabilin ang NIR bangud madamo na ang nalab-utan sang linghod nga rehiyon.
