BUTUAN CITY – Nagtoo ang grupong Federation of Free workers nga maayo ang sugyot nga pa-ubsan ang edad sa mga mukandidato pagka-residente sa Pilipinas kansa dili na kinahanglan pa og constitutional convention, sanglit pwede raman kining mapaagi sa people’s initiative o kaha sa Constitutional Amendments.
Madumdumang gisang-at sa Young Guns Bloc sa House of Representative ang Resolution of Both Houses No. 2 nga nagtumong nga pamub-an ang edad sa makadagan og Presidente ug Bise Presidente sa Pilipinas gikan sa 40 ngadto sa 35-anyos, ingon man sa pagka-Senador gikan sa 35 ngadto sa 30-anyos.
Uyon si Federation of Free Workers President Atty. Sonny Matula sa argumento sa maong mga magbabalaod nga 52% matud pa sa mga Pilipino, nag-edad og 30 anyos paubos, kansa nagpasabot nga daghan sa populasyon sa Pilipinas ang batan-on, kansa mga globally competitive na ug andam nang modumala sa nasud.
Pasabot ni Matula, dili na kinahanglan ang constitutional convention sa maong kabag-han tungod kay parte raman sa batakang balaod ang kinahanglang utrohon, ug kung dunay constitutional convention, mamahimo matud pang mabag-o sa mga delegado ang gusto nilang utruhon sa konstitusyon.
Dugang sa opisyal, mas maayo nga pa-ubsan na ang edad sa mga makadagan pagka-presidente sa nasod, sama sa Estadus Unidos, kansa sumbanan sa konstitusyon sa Pilipinas, mahimo nang makadagan sa maong mga posisyon ang mga nag-edad og 35 anyos.
Gawas niini, napamatud-an na usab sa kasaysayan nga mga batan-on ang kanhi mga lider sa Pilipinas, sama nila Jose Rizal ug Emillio Aguinaldo.
