BUTUAN CITY – Kasado na ang Pinagka-isang Samahan ng mga Tsuper at Opereytor Nationwide kon PISTON-Caraga alang sa ilang usa ka adlaw nga transport strike nga himuon dinhi sa rehiyon sa Caraga ilabina dinhi sa dakbayan sa Butuan karong Lunes, Oktubre 16.
Sa eksklusibong interview ning sibyahan, gipadayag ni Isaiah Geñorga sa PISTON-Caraga nga ang dili na nila ma-agwantang paglutos sa gobyerno ngadto sa transport sector pinaagi sa Department of Transportation kon DOTr, ang hinungdan sa ilang pagsuporta sa nationwide transport strike.
Gidugang pa niini nga ang mga balaud nga gimugna sa maong ahensya, wala matud pa’y nahatag nga kaayuhan ngadto kanila ilabina ang gihingusgan niining modernization program nga mag-phase out sa mga de pasaherong dyip.
Paningkamutan nilang siento porsiento nilang maparalisa ang pagpamasada sa mga dyip pinaagi sa mugnaon nilang mga choke points nga maoy mubabag sa ilang ka-ubanang planong mamasada nianang adlawa.
Apan giklaro sa opisyal nga gi-briefing na nilang daan ang ubang grupo nga mulambigit sa ilang kalihukan nga paningkamutang dili mahimong duguon ang nasangpit nga strike og likayan ang pagpanuyak.
Parahon lang matud pa diha sa imontar nga mga choke points ang masapong namasayro og pasabton sa kamahinungdanon sa maong kalihukan. (Beth Ruiz)
