BUTUAN CITY – Gikumpirma sa gobyerno sa Pilipinas nga giaresto ang pipila ka Filipino nationals tungod sa pagdudang mihimo kini og pagpaniktik o pag-espiya para sa China, nga gitawag nga usa kag “seryosong hisgutanan sa nasyunal nga seguridad.”
Sumala sa National Security Council (NSC), nahunong na ang operasyon sa mga indibidwal nga matud pa milihok sa mandu sa Chinese intelligence.
Bisan og wala naghatag og eksaktong ihap o detalye kung dunay naduso nang kaso, gibutyag sa NSC nga miangkon na ang mga nalambigit sa ilang partisipasyon sa espionage activities ug nakig-alayon na sa mga awtoridad.
Ang tanan matud pang nadakpan pulos mga Pilipino.
Sigon usab sa pipila ka security sources, dili moubos sa tulo ka indibidwal ang nalambigit.
Usa sa mga akusado ang nagbutyag nga una siyang gihanyagan sa usa ka ilado nga Filipina nga tigsulat og opinion articles bugti sa bayad samtang siya ang junior staffer pa sa Department of National Defense.
Hangtud nga milapad matud pa kini sa paghatag og impormasyon mahitungod West Philippine Sea ug kalambigitang pangdepensa sa nasud lakip ang pakig-alayon sa United States.
Aminado ang suspek nga wala niya gelayon nahibal-an nga para sa interes sa China ang iyang gihimo ug naglisud na siyang moatras tungod kay nagkinahanglan siya og kwarta.
Gihimo matud pa niya ang nasangpit nga aktibidad gikan sa 2023 hangtud sa 2025, taliwa sa migrabeng tensyon sa West Philippine Sea tali sa Pilipinas ug China.
