BUTUAN CITY – Mibati na og kabalaka og kahadlok ang pipila sa mga Pinoy nga atua karon sa Florida, USA human nga ila nang nasinati ang kusog nga ulan og hanging hatud sa pag-landfall na sa hurricane Irma.
Sa pakighinabi ning sibyahan, gibutyag ni Floregel Orejas, usa ka Butuanon nga nakabana ug Amerikano ug 13 ka tuig nang nagpuyo sa Manatee County, Florida, apil sila sa iyang pamilya sa mga wala misunod sa evacuation order sa ilang lokal nga kagamhanan.
Ang ila lang gihimong basehan sa wala paghikling mao ang kalayo matud pa nila sa baybayon diin gila-umang mu-abot sa 12 ngadto sa 15 ka tiil ang muhapak nga storm surge.
Bisan pa man, hugot gihapon ang ilang pagpangandam aron lang mahimong luwas sa tibuok panahon sa paghapak sa super typhoon.
Mi-apela lang siya og pag-ampo ilabina gikan sa iyang mga kabanay dinhi sa Butuan aron kanunay silang luwas dungan sa pag-awhag nga dili mabalaka sa ilang kahimtang. (Beth Ruiz)
