BUTUAN CITY – Gipa-alerto na sa Office of the Civil Defense kon OCD-Caraga ang tanang mga Local Disaster Risk Reduction and Management Councils kon CDRRMC sa tibuok Caraga Region tungod sa mga posibleng matigayong flash floods ug landslides tungod sa nagpadayong pag-ulan nga hatud sa bagyong Vicky.
Kini human nagpagawas og general flood advisory number 2 kaganinang sayo sa buntag ang Philippine Atmospheric, Geophysical and Astronomical Administration kon PAGASA tungod sa 12-oras nga pagbundak sa ulan.
Sa eksklusibong pakighinabi sa Bombo Radyo Butuan, gpadayag ni OCD-Caraga Regional Director Liza Mazo nga padayon ang ilang monitoring kalabot sa epektong hatud sa padayong pag-ulan sa entiro rehiyon human nga apil sa anaa sa tropical storm signal number 1.
Ila pang gihulatan ang situational reports nga ipadala sa mga local government units sa Agusan del Sur ug Surigao del Sur nga maoy anaa karon sa orange warning tungod sa kusog nga pag-ulan.
Partikular nga gipa-amping sa opisyal ang mga nagpuyo kilid sa riverbanks ug sa mga low-lying areas nga posibleng bahaon igon man kadtong anaa sa kilid sa bukid tungod sa posibleng landslides.
Duna na sila’y nadawat nga mga taho nga pipila ka mga lugar nga nabahaan sa maong mga lalawigan ug kini karon ang ilang gi-verify.
