BUTUAN CITY – Gi-akusahan sa presidente sa Ukraine nga si Volodymyr Zelensky ang pipila ka European allies nga naningkamot sa “pag-blackmail” sa Kyiv aron ipabalik ang pag-agas sa pipeline nga nagdala og lana sa Russia ngadto sa Hungary ug Slovakia.
Sumala pa niini kung ipabalik ang pag-agas sa Russian crude oil pinaagi sa Ukraine padulong sa European Union (EU), murag gipahuyang o gitangtang ang economic sanctions batok sa Moscow.
Pagbutyag pa sa Ukraine nga ang Druzhba oil pipeline, nga gitukod pa sa panahon sa Soviet Union, nadaot tungod sa air strikes sa Russia niadtong Enero ug wala pa naayo hangtod karon.
Ang Hungary, nga nagsalig pag-ayo sa enerhiya gikan sa Russia, nagbabag sa bag-ong EU sanctions batok sa Moscow ug sa 90 bilyones euros nga loan alang sa Kyiv, hangtod maablihan pag-usab ang pipeline.
Ang prime minister sa Hungary nga si Viktor Orbán gihimong dakong isyu sa politika ang iyang pagkontra sa Ukraine samtang nagkaduol ang eleksyon sa Abril.
