BUTUAN CITY – Gihulatan pa sa lokal nga kagamhanan sa Nasipit, Agusan del Norte ang report gikan sa Bureau of Fire Protection kalabot sa sunog kaganinang sayo sa hapon sa pipila ka mga tindahan sa gawas nga bahin sa ilang merkado publiko.
Sa eksklusibong pakighinabi ning sibyahan, gibutyag ni Mayor Roscoe Plaza nga padayon pa ang pagsuta kung unsa’y hinungdan sa pag-ulbo sa kalayo nga gikan matud pa sa tindahan sa negosyanteng si Arnel Calbe.
Nasayrang tungod sa kusog nga hangin ug init nga panahon, paspas nga milatay sa kasikbit nga mga establisamiento ang kalayo rason nga na-abo usab kini apil na ang usa ka bilyaran. Apil sa gisuta karon ang saktong ihap sa mga establisamientong nasunog ingon man ang kinatibuk-ang damyos niini.
Gipasalig niini ang paghatag og tabang ngadto sa mga nasunugan apan padayon pa ang ilang pagpanguha og mga datus.
Panawagan lamang sa mayor ngadto sa tanang Nasipitnon nga mag-amping kanunay ilabina nga ting-init karon nga panahon ug likayan ang mga butang nga posibleng maoy hinungdan sa sunog sama sa pagpasagad sa lutu-anan.
Siguruhon usab nga ma-ibot ang tanang naka-plug nga appliances ilabina kung biyaan ang pinuy-anan aron malikayan ang ingon niini nga panghitabo.
