BUTUAN CITY – Muabot sa 14-milyones pesos ang damyos sa sektor sa agrikultura sa rehiyon sa Caraga tungod sa halos duha ka semanang pag-ulan nga hatud sa shearline.
Sigon ni Melody Guimary, Field Operations Division Chief sa Department of Agriculture kon DA-Caraga, nga posibleng mosaka pa ang maong kantidad higayong dunay mga lokal nga kagamhanan nga magsubmite sa ilang report.
Kini tungod kay pipila lang ka LGU gikan sa Surigao Del Sur og Agusan Del Sur ang nagsubmite sa damyos sa ilang opisina. Base sa gihimong validation, muabot sa 1,153 ektaryas sa humay, mais og mga gulay ang apektado sa pagbaha.
Pasalamat nalang si Guimary nga bag-o pa natanom ang humay diin muabot lang sa 20-mil pesos kada ektarya ang kwentada sa nadamyos.
Sa hisgutanang livestock, gamay lang matud pa ang madamyos niini nga sagad mga binuhing manok.
Sa karun padayong modawat ang buhatan og reports gikan sa mga lokal nga kagamhanan mahitungod sa nadamyos sa ilang agrikultura.
Kini aron eapil usab nila sa ilang report ngadto sa central office alang sa planong rehabilitasyon.
Apan giklaro sa opisyal nga duna nay mga mag-uuma nga napulian og seeds aron subling makatanom ilabina karung mianindot na ang dagan sa panahon.
