BUTUAN CITY – Gipabilib ni Filipino singer Matty Juniosa ang mga hurado ug audience sa usa ka sikat nga British talent show human sa iyang standing ovation audition.
Gikanta sa 27-anyos nga singer ang “Purple Rain” ni Prince, nga miresulta sa kusog nga pakpak gikan sa audience ug nakadawat pa siya og Golden Buzzer gikan sa huradong si Simon Cowell rason nga direkta na siyang sulod sa live shows sa kompetisyon.
Sa wala pa ang audition, gipangutana siya ni Alesha Dixon kung unsa ang iyang damgo kansa gitubag niyang gusto niyang mahimong usa ka sikat nga world performer, bisan pa sa iyang mga kabalaka tungod sa kapakyas sa miaging mga singing competitions.
Mahinumduman nga niadtong 2019 misalmot siya sa Idol Philippines diin nakasulod siya sa Top 12.
Sa pagkakaron, nagpuyo si Matty sa Glasgow, United Kingdom, diin siya nagtrabaho isip part-time waiter samtang gihingusgan ang iyang damgo sa musika.
