BUTUAN CITY – Gisuspende og usa ka tuig sa Japan Boxing Commission si kanhi 3 division champion John Riel Casimero human wala makab-ot ang 122-pound super bantamweight limit sa ten-round bout nila Saul Sanchez niadtong Dominggo.
Ang 35-anyos nga si Casimero, misobra og usa ka kilo sa official weigh-in niadtong Sabado kondiin gihatagan pa kini og duha ka oras nga makuha ang sakto nga timbang apan pagbalik niini, mitimbang ang Ormoc boxer ug 123-libras. Bisan misobra ang timbang gihinayon gihapon ang away nga miresulta sa kapildihan sa Mexican boxer sulod lamang sa unang round.
Sa kasamtangan si Casimero duna’y record nga 34 ka daug kondiin 23 pinaagi sa knockouts samtang 4 ang pildi ug usa ang draw. Gi-promote si Casimero sa Treasure Boxing Promotion sa duha ka ulahing away niini sa Japan batuk nila Yukinori Oguni ug Saul Sanchez nga miresulta sa technical draw ug technical knockout.
