BUTUAN CITY – Human ang kapin duha ka tuig nga pagpahulay, mibalik na usab sa iyang paglangoy si environmentalist ug swimming lawyer Ingemar “Pinoy Aquaman” Macarine aron ipadayon ang tibuok kinabuhi na nga tinguhang maproteksyunan ang kadagatan.
Kagahapon Pebrero 24, malampusong nalangoy ni Macarine ang kadagatan gikan sa Buluan Island ngadto na sa Buluan Port sa Zamboanga Sibugay, nga duna’y gilay-ong 2.7 kilometros.
Sa eksklusibong pakighinabi sa Bombo Radyo Butuan, gipadayag ni Atty. Macarine nga unang higayon niyang milangoy sa maong dagat kansa base sa iyang pakisusi duna’y daghang makapatay nga box jelly fish matag-summer season. rason nga dili kini languyan sa maong panahon.
Ang mas nakapasahi niini tungod kay sukwahi sa iyang na-andan nga mag-solo lang, ka-uban niya kagahapon ang 15 ka mga local swimmers sa nasangpit nga mga lugar rason nga gibibohan siya sa ilang gihimo.
Ang iyang charity swim nga gibansagang “Langoy Para sa Kinaiyahan ug Malungtarong Turismo” (Swim for the Environment and Sustainable Tourism), gi-organisa ni 2nd District Representative Ann Hofer sa Zamboanga Sibugay isip kabahin sa mga kalihukan sa pagsa-ulog nila sa ika-22 nga anibersaryo sa pagkabuwag na nila nga probinsya.
Nanguna sa maong kalihukan si Philippine Sport Commissioner Ramon Fernandez, kinsa maoy nanghingusog sa open-water swimming sports diha sa grassroots level sa nasud.
Ang 1998 law nga nagmugna sa maong probinsya, gipangamahanan ni anhing Governor ug Congressman George Hofer.
Ang katapusang paglangoy ni Atty. Macarine natigayon niadtong Nobyembre 13, 2017 gikan sa Pamilacan Island ngadto na sa lungsod sa Baclayon, lalawigan sa Bohol kansa mao na ang iyang ika-34 nga open water swim ug ika-17nga marathon swim sa iyang career.
Naila si Atty. Ingermar Macarine sa bansag nga “Pinoy Aquaman” tungod sa pagtakda og mga records isip bugtong Filipino kinsa mi-arisgar sa open-water swimming sa pipila ka bahin sa nasud ug ubang kanasuran.
