BUTUAN CITY – Nikabat sa 5 ka bulawang medalya ang nasakmit sa duha ka teenage Filipina gymnasts nga myembro sa Philippine National Women’s Rhythmic Gymnastics Team gikan sa ilang kampanya sa 3 ka nasud sa Europa.
Gi-isa sa 13 anyos nga si Breanna Labadan nga taga Butuan City ang bandera sa nasud human nga gilampaso ang uban pang intrante ug nasakmit ang Junior Individual All-Around titles sa gilusad nga gymnastic meet sa Slovakia, Hungary, ug Denmark.
Pinaagi sa makapahingangha nga performances nahakot ni Labadan ang 3 ka bulawang medalya gikan sa Liptov Cup 2019 nga gilusad niadtong Nobyembre 17 sa Liptovsky, Slovakia, 2019 Magic Cup Rhythmic Gymnastics Meet nga gipahigayon niadtong Nobyembre 10 sa Hungary, ug ang RG Friends Masters Gymnastics Meet niadtong Nobyembre 2 ug 3 sa Denmark.
Samtang duha ka bulawang medalya usab ang nasilhig ni Daniela Reggie Dela Pisa nga taga Cebu human ang impresibong routines nga gipakita sa Senior Individual All-Around titles sa Slovakia ug Hungary.
Nasayran nga si Dela Pisa ang makigtigi usab aron makuha ang bulawang medalya sa 30th Southeast Asian Games nga magsugod December 1 hangtod 9 sa historic Rizal Memorial Sports Complex sa Manila. Samtang si Labadan gikatakdang modula sa Estados Unidos ug Hungary sa 2020.
