BUTUAN CITY – Kapin duha ka dekada na ang nakalabay apan nagpabiling walay makapildi sa Guinness World Record sa usa ka lalaki gikan sa Sweden human niyang mamugna ang pinakagamay nga motorsiklo sa tibook kalibutan.
Tuig 2003 sa dihang gimugna ni Tom Wiberg ang sakyanang gibansagan niyang “Smalltoe.” Sa sobra kagamay niini, igo lang kini sa palad sa usa ka tawo. Duna lang kini wheelbase nga 3.14 pulgadas ug katas-on sa lingkuranan nga 2.55 pulgadas.
Ang ligid sa unahan dunay diyametrong 16 milimetros samtang 22 milimetros usab ang sa likuran. Mitimbang lang ang tibook nga motorsiklo og 1.1 kilos.
Bisan paman sa sukod niini, migana ug tinood nga masakyan ang Smalltoe. Sa tabang sa espesyal nga sapatos nga dunay attachments, malampuson kining namaneho ni Wiberg sa kalay-ong kapin 10 metros.
Gipadagan kini sa 0.22 kW nga makina ug muabot sa kapaspas nga duha ka kilometro kada oras.
Nalabwan ni Wiberg ang kanhe record niadtong 1990 nga natala nila Simon Timperley ug Clive Williams gikan sa UK.
Sumala sa Guinness, kung dunay gustong moilog sa titulo ni Wiberg karun, kinahanglan nilang magmugna og usa ka butang nga mas gamay pa sa usa ka dulaan apan kayang paandaron sa usa ka tawo.
