BUTUAN CITY- Giangkon sa rebeldeng grupong New People’s Army (NPA) nga sila ang responsable sa pagsunog sa duha ka heavy equipment sa Brgy. Karihatag, lungsod sa Malimono, Surigao del Norte pasado alas-12 kagahapon sa udto.
Gidab-dadan nila ang usa ka back hoe ug usa ka grader nga gipanag-iyahan sa usa ka private road contractor.
Sa eksklusibong pakighinabi sa Bombo Radyo Butuan, gikumpirma ni Ka Leo de Guerra, nagpa-ilang tigpamaba sa NPA-Surigao del Norte, ilang gisunog ang mga ekwipong maoy gigamit sa usa ka construction firm sa road concreting sa maong barangay tungod sa wala matod pa paghatag og pagtagad sa tag-iya niini, ngadto sa ilang mga hangyo.
Dugang ni Ka Leo, ang gihimong kasamok sa mga walhong grupo sa lain-laing parte sa rehiyon, mando sa ilang central office isip tubag ug banat usab tungod sa nagpadayong combat military operations sa militar kansa pakyas matud pa nga pangandoy sa gobyerno.
Samtang, gilusad na sa kapulisan ug kasundaluhan sa 30th Infantry Battalion ang hot pursuit operations batok sa mga maong mga rebelde.
