BUTUAN CITY – Padayon karun ang pagpangandam sa Department of Social Welfare and Development kon DSWD-Caraga alang sa hingpit nga pag-implementar sa programang Tara Basa, Tutoring Program nga gitakda sunod bulan, Abril.
Sigon ni Nestogen Goc-ong, Project Development Offers II sa DSWD-Caraga nga ning tuiga gisugdan nila ang pagpangandam alang sa pilot implementation niini dinhe sa siyudad sa Butuan, sa Dapa og General Luna sa Surigao Del Norte.
Target niini nga tabangan ang mga magtutungha sa Caraga State University nga mikuha sa kursong edukasyon pinaagi sa paghimo kanila og tutor sa mga bata nga mag-Grade 2 kansa dili pa makabasa.
Sulod sa 20 ka adlaw nga ilang pagtutor, makadawat sila og suweldo nga 435 pesos matag adlaw.
Ang mga tutor mismo ang moadtu sa tunghaan diin gawas sa mga-grade 2 pupils lakip sa target nga benipisyaryo ang ilang mga ginikanan nga dunay madawat usab nga 250 pesos matag adlaw.
Nanghinaot nalang si Goc-ong nga makapirma na og memorandum og agreement ngadto sa LGU sa Butuan aron matabangan usab sila sa pagpatuman sa maong proyekto.
Lakip sa gitumbok niini nga tabang ang paghatud sa mga tutor ngadto sa mga magtutungha lakip na usab sa ilang pagkaon.
Samtang gipasabot usab sa opisyal nga duha ka rason nganung namugna ang maong programa. Kini aron matubag ang problema nga usa sa napulo ka estudyante dili makahibalong mobasa og ang 29.4 percent nga drop out rate sa mga magtutungha sa kolehiyo niadtong tuig 2024 diin ang dakong factor mao ang pinansiyal.
