BUTUAN CITY- Nagtuo si President Ferdinand Marcos Jr nga kung mahatagan og higayon ang Pilipinas nga mahimong miyembro sa United Nations Security Council (UNSC), dili lamang sa kaugalingong interes sa nasud ang pagadumalahan niining papel kundi alang usab sa kaayohan sa ubang nasud. Kini ang gipadayag ni Palace Press Officer USec. Claire Castro.
Dugang pa sa opisyal sa Palasyo nga ang tingog ug tumong sa nasud mao ang i-promote ang international safety, peace, ug security kauban ang lain pang miyembro sa estado sa United Nations.
Posible usab matud pa nga hisgutan sa Pilipinas sa Security Council ang kaugalingon niining mga isyu kalabot sa national security.
Ang Pilipinas nagtinguha nga makakuha og non-permanent seat sa United Nations Security Council alang sa termino sa 2027–2028, kung asa gikatakdang ipahigayon ang election sa Hunyo 3, 2026.
Isip nag-unang sanga sa United Nations kansa adunay responsibilidad nga imintinar ang pangkalibutangong kalinaw ug siguridad, ang UN Security Council minghimo na usab og mga sitwasyong nanginahanglan og peacekeeping operations sa nagkanda-iyang parte sa kalibutan..
