BUTUAN CITY – Gireklamo ni Konsehal Jose Bayang sa lungsod sa Del Carmen, Siargao Island, Surigao del Norte ang pagbaboy matud pa kaniya sa taga-Department of Social Welfare and Development kon DSWD-Caraga human nga gibinu-angan lang pagtubag ang iyang reklamol kalabot sa pipila sa iyang mga constituents sa Brgy. Tuburan nga wala makadawat sa 5-mil pesos nga cash aid sa gobyerno human gipang-erase sa ilang barangay treasurer ug barangay secretary.
Sa eksklusibong pakighinabi sa Bombo Radyo Butuan, gpadayag ni Kagawad Bayang nga iyang gidala ang reklamo sa pipila ka mga residente sa Brgy. Tuburan ngadto mismo sa munisipyo sa Del Carmen diin gipanghatag ang cash aid alang sa mga biktima sa bagyong Odette.
Sa saysay sa kagawad, nawala sa listahan ang pangalan sa ubay-ubay nga mga residente base matud pa sa mando sa ilang barangay secretary ug treasurer rason nga iya kining gipa-abot sa DSWD.
Temporaryo matud pang gipahunong ang pay-out aron mabalik sa listahan ang mga gipang-erase ug ang mga wala nahatagan apan dako na lang ang iyang kadismaya dihang wala gihapon makadawat sa maong ayudang pinansyal ang mga tawong iyang gipanglista.
Misamot ang iyang kapungot dihang nag-post sa Facebook ang anak sa ilang barangay secretary nga nagkuha sa iyang opinyon kung unsa ang iyang buhaton human na kasuham matud pa siya tungod kay iyang gitas-an og tingog ang taga-DSWD.
Gisungog pa usab siya dihang nakahilak siya sa kalagot tungod sa dili patas nga paghatag sa ayuda nga mugna matud pa sa pamulitika.
Kini ilabina nga ang mga gipang-erase sa listahan, mao kadto ang mga angayang hatagan tungod sa kakabus ilabina nga ang uban, mga senior citizens na.
