BUTUAN CITY – Midangop dinhi sa Bombo Radyo Butuan ang usa ka lider sa kapilya uban sa tulo niya ka mga ka-ubanang membro sa Kabus Padatoon Community Ministry International Inc. kon KAPA-Butuan aron ireklamo ang wala na pagpa-payout kanila.
Kini human nga gipagukod na ni Pangulong Rodrigo Duterte og gikasuhan na sa Securities and Exchange Commission kon SEC ang founder nga si Joel Apolinario og mga opisyal sa maong investment scam.
Sa eksklusibong pakighinabi sa Bombo Radyo Butuan, gibutyag sa ilang tigpamaba nga gitago lang sa pangalang Langga nga taga-Brgy. Loreto, Agusan del Sur nga bisan og nasayod na silang donasyon lang ang ilang gipirmahang papel dihang nagpamembro sila niini, apan nangindahay gihapon sila nga ma-uli kanila ang ilang gi-donate nga kwarta.
Kini tungod kay ang iyang gi-invest nga 10-mil pesos gikan man sa iyang anak kinsa supak sa iyang pag-apil rason nga gusto niyang ma-ulian niini.
Tumang kasubo ng iyang gibati tungod kay igo lang siyang naka-payin niadtong Mayo 28 og sa Hunyo 28 unta ang iyang unang payout apan dili na kini mahitabo pa tungod sa pagpagukod na sa gobyerno ngadto sa ilang mga opisyal.
Aminado siyang nakadungog siya sa wala’y hunong nga pagpasidaan sa Bombo Radyo nga scam ang gisudlang investment sa KAPA apan ila kining gibalewala tungod sa kahangol sa kwarta.
Aminado usab siyang tawo lang nga matintal sa gikabisihan sa uban rason nga naka-invest siya wala pa’y labot sa iyang igsoon nga 400-mil pesos ang na-invest og uban pa nilang mga kahigalaan og mga kabanay.
Ang iyang gikamahayan tungod kay usa ka semana gikan sa iyang pagbubo og kwarta, mihinay na ang operasyon sa KAPA ilabina dihang gi-anunsyo na ni Pangulong Duterte nga illegal kini.
