BUTUAN CITY – Status quo lang ang premium contribution karong tuiga sa Philippine Health Insurance Corporation kon PhilHealth human gimando ni Pangulong Rodrigo Duterte nga i-defer una ang punto-5 nga usbaw niini gikan sa 3% ngadto na unta sa 3.5-porsiento.
Sa eksklusibong pakighinabi sa Bombo Radyo Butuan, gibutyag ni PhilHealth- Caraga spokesperson Sandro Etic nga hulatan na lang nila ang himuong amendment sa balaud nga maoy nagmando alang sa usbaw sa singil sa binulang kontribusyon base na usab sa napapasar nga Republic Act 11223 kon Universal Health Care Act kansa mao ra usab ang ilang gisunod.
Dakong tabang na kini sa ilang mga membro ilabina sa mga nawad-an og trabaho.
Gipasabot ni Etic nga ang usbaw unta nga ipatuman ning bulana, ilang igahin sa dugang benepisyo sa mga membro.
Dili matud pa sila mabalaka kung mahurot na ang ilang pundo pagbayad sa benepisyo sa ilang mga membro tungod kay misaad man ang Malakanyang nga hatagan sila og pundo sama sa gihimo niini sa Philippine Red Cross.
Hinuon, mala-umon kining mapatuman na ning tuiga ang ilang Kunsulta Package.
