BUTUAN CITY- Magimplimentar og bag-ong palisiya ang Philippine Health Insurance Corporation kon PhilHealth sugod Abril 1 nga “No SPA, No Payment” alang sa mga self-paying nga miyembro isip kabahin sa digitalization ug pagpaayo sa serbisyo.
Sa Advisory 2026-0016, gipahibalo nga kinahanglan una mag-generate og Statement of Premium Account (SPA) ang mga self-earning individuals, professional practitioners ug land-based overseas Filipinos aron malikayan ang sayop sa manual posting ug mas paspas ang pag-credit sa kontribusyon.
Ang QR-coded SPA mahimong makuha pinaagi sa opisyal nga portal ug ipresenta sa cashier sa PhilHealth office o accredited collecting agent aron makompleto ang transaksiyon.
Gipahinumdoman usab sa ahensya nga ang tukma ug updated nga records sa kontribusyon maoy garantiya sa pagkapadayon sa benepisyo sa health insurance ug gidasig ang publiko nga mag-transact lamang sa awtorisado nga mga ahente ug protektahan ang ilang personal nga impormasyon.
